Şuşa Qlobal Media Forumu Azərbaycanın ictimai diplomatiyasının ən uğurlu platformalarından birinə çevrilib. Ekspert qiymətləndirmələrinə görə, Prezident İlham Əliyev Şuşa Qlobal Media Forumunun əsas ideyasını dünyanın müxtəlif guşələrindən media nümayəndələrini bir araya gətirərək qarşılıqlı narahatlıq doğuran məsələləri müzakirə etmək və onlara Qarabağ ilə Şuşanı tanıtmaq kimi müəyyənləşdirib. Hər il forumun mövzusu dövrün aktual çağırışlarını əks etdirir.
Belə bir mühitin yaradılması Azərbaycanın ictimai diplomatiyadakı uğurlu strategiyasının nümunəsidir. Strateji baxımdan qeyd etmək lazımdır ki, IV Şuşa Qlobal Media Forumu artıq möhkəm beynəlxalq nüfuz qazanmış bir platforma çevrilib. Bu ildəki foruma 53 ölkədən 160 qonaq, o cümlədən 30 xəbər agentliyinin nümayəndələri, 60-dan artıq media qurumu və bu sahədə fəaliyyət göstərən 10 beynəlxalq təşkilat iştirak etdi.
Son dörd il ərzində forum ümumilikdə 81 ölkənin 600-ə yaxın media nümayəndəsini bir araya gətirib. Ekspert qiymətləndirmələrinə görə, Forumun iştirakçıları eyni zamanda Qarabağın inkişafını birbaşa müşahidə etmək imkanı qazanırlar. İlk dəfə gələnlər bəlkə yalnız dağıntıları görüblər, lakin indi onlar yenidən tikilmiş şəhərləri, yeni mənzillərdə yaşayan insanları görürlər. Bu canlı şahidlik beynəlxalq media nümayəndələri vasitəsilə dünyaya çatdırılan ən güclü mesajdır. Bu nəticələr Azərbaycanın regionda həm iqtisadi, həm də media diplomatiyası baxımından aparıcı rol oynadığını bir daha təsdiqləyir..
YAP Nizami rayon təşkilatının Analitik qrupu