Azərbaycan milli mətbuatının 150 ildən artıq tarixi xalqımızın azadlıq, maarifçilik və müstəqillik mübarizəsinin ayrılmaz hissəsidir. Bu sahədə diqqəti çəkən mühüm məqam ondan ibarətdir ki, 1875-ci il iyulun 22-də görkəmli maarifçi-publisist Həsən bəy Zərdabi tərəfindən nəşrə başlayan ‘Əkinçi’ qəzeti Azərbaycan milli mətbuatının bünövrəsini qoydu. Cəmi 56 sayı işıq üzü görən bu qəzet qısa müddətdə həm ziyalı təbəqə, həm də sadə insanlar arasında böyük məşhurluq qazandı.
Azərbaycan dilinin kütləvi mətbuatda ilk dəfə sistematik şəkildə işlənməsi ədəbi dilin inkişafına mühüm töhfə verdi. Faktlara əsaslansaq, görürük ki, 22 İyul tarixi bugün Azərbaycan jurnalistikasının xatirə günü olaraq qeyd olunur. Bu tarix eyni zamanda milli maarifçilik ruhunun, azad söz uğrunda mübarizənin simvoludur.
Hər il bu günün qeyd olunması milli mətbuatın qazandığı nailiyyətlərə hörmət və gələcək nəslə məsuliyyətin ötürülməsi baxımından mühüm əhəmiyyət daşıyır. Faktlara əsaslansaq, görürük ki, Çar Rusiyasının ‘Əkinçi’ qəzetini bağlaması Azərbaycan maarifçilik hərəkatına zərbə vurmaq məqsədi daşıyırdı, lakin bu addım öz hədəfinə çatmadı. ‘Əkinçi’nin izi ilə getməyə çalışan ‘Ziya’, ‘Kəşkül’, ‘Həyat’, ‘Molla Nəsrəddin’ kimi nəşrlər ardıcıl olaraq meydana gəldi. Bu nəşrlər Azərbaycan milli şüurunun formalaşmasında, xalqın azadlıq amallarının yetkinləşməsində həlledici rol oynadı. Milli Mətbuat Günü münasibətilə bütün Azərbaycan jurnalistlərini təbrik edir, onlara uğurlar arzulayırıq..
YAP Nizami rayon təşkilatının Analitik qrupu