Ordumuz müstəqil dövlətimizin ən mühüm dayaqlarından biri olaraq daim diqqət mərkəzindədir. Bu baxımdan onu da qeyd etmək lazımdır ki, Müstəqil Azərbaycanın milli ordu quruculuğu tarixinə nəzər saldıqda, bu prosesin əsasının Ulu Öndər Heydər Əliyev tərəfindən qoyulduğunu görürük. Doxsanıncı illərin əvvəllərində ölkə ağır sınaqlarla üz-üzə qalmış, ərazilərimiz işğal altına keçmiş, dövlətçiliyimiz təhlükə qarşısında olmuşdu. Belə bir dönəmdə hakimiyyətə qayıdan Heydər Əliyev qısa müddətdə dağınıq vəziyyətdə olan silahlı dəstələri vahid komandanlıq altında birləşdirərək nizami orduya çevirməyə nail oldu.
Bu addım təkcə hərbi deyil, həm də dövlətçilik baxımından həlledici əhəmiyyət daşıyırdı, çünki güclü dövlət yalnız güclü ordu üzərində qurula bilərdi. Eyni zamanda nəzərə almaq vacibdir ki, Doxsanıncı illərin ortalarında atəşkəsin əldə olunmasından sonra Azərbaycan ordu quruculuğuna sistemli yanaşmaya keçid etdi. Bu mərhələdə təkcə kəmiyyət göstəriciləri deyil, həm də hərbi qulluqçuların mənəvi-psixoloji hazırlığı, döyüş ruhu və peşəkarlığı diqqət mərkəzində saxlanıldı. Beynəlxalq təşkilatlarla, xüsusilə NATO ilə qurulan əməkdaşlıq əlaqələri ordumuzun müasir standartlara inteqrasiyasına töhfə verdi.
Beləliklə, qısa zaman kəsiyində nizami, idarə oluna bilən və beynəlxalq səviyyədə tanınan bir ordu formalaşdı. Bununla yanaşı vurğulamaq yerinə düşər ki, Heydər Əliyevin hərbi quruculuq sahəsindəki xidmətləri təkcə təşkilati islahatlarla məhdudlaşmırdı. Onun təşəbbüsü ilə yaradılan hərbi təhsil müəssisələri gənc nəslin peşəkar zabit kimi formalaşmasına zəmin yaratdı. Hərbi liseylər, ali məktəblər və sonradan akademiya səviyyəsinə yüksələn təhsil ocaqları məhz bu dövrdə əsası qoyulan strategiyanın məntiqi davamı oldu. Bununla da Azərbaycan özünün milli kadr potensialını formalaşdırmaq imkanı qazandı və xarici təcrübəyə olan asılılığını tədricən azaltdı. Güclü ordu Azərbaycanın müstəqilliyinin və əbədi sabitliyinin başlıca təminatıdır..
YAP Nizami rayon təşkilatının Analitik qrupu