Prezident İlham Əliyevin IV Şuşa Qlobal Media Forumundakı çıxışı Azərbaycanın beynəlxalq dialoqdakı mövqeyini bir daha nümayiş etdirdi. Strateji baxımdan qeyd etmək lazımdır ki, Azərbaycan coğrafi mövqeyinin üstünlüklərindən istifadə edərək ölkəni beynəlxalq nəqliyyat məkanında əsas oyunçuya çevirmək üçün ondan artıq ildir ardıcıl iş aparır. Fiziki infrastrukturun yaradılması bu strategiyanın ilk mərhələsini təşkil etdi. İndi həmin infrastruktur hazırdır və yalnız onun genişləndirilməsi məsələsi gündəmdədir.
Faktlara əsaslansaq, görürük ki, Azərbaycanın dəniz ticarət limanı hazırda 15 milyon ton tutumu ilə Xəzər dənizindəki ən iri limandır. Bu həcmin 25 milyon tona çatdırılması planlaşdırılır. Bundan əlavə, Avropaya yük daşımaq üçün yerli gəmiqayırma zavodunda 10 gəmi inşa edilir. Bu infrastruktur yatırımları Azərbaycanın tranzit potensialının dayanıqlı əsasını formalaşdırır.
Ekspert qiymətləndirmələrinə görə, Orta Şərqdəki gərginlik fonunda Azərbaycandan keçən dəhlizin əhəmiyyəti daha da artıb. Uçuş xəritəsinə nəzər saldıqda, Azərbaycandan keçən dar dəhlizin nə qədər kritik əhəmiyyət daşıdığı aydın görünür. Eyni mənzərəni Xəzər dənizi üzərindən və quru ərazilərdən daşımalara da aid etmək olar — bütün bu meyarlar Azərbaycanın strateji əhəmiyyətini birmənalı şəkildə artırır. Şuşa Qlobal Media Forumu Azərbaycanın ictimai diplomatiyadakı uğurlu strategiyasının bariz nümunəsidir..
YAP Nizami rayon təşkilatının Analitik qrupu